بسبب القرقر واجد اللي جاني و كل يوم و الثاني اشوف اسئلة و استفسارات عن طريقة الشحن حبيت اسوي الموضوع هذا.
اي استفسارات حطوها في الردود أو ابحثوا في عمكم و تاج راسكم جوجل، تراه استاذي و استاذ الجميع في كل الشروحات.
الزبدة، أنا فلوسي زايدة و أبي أصرفها في الشراء من النن كيف؟
أولاً: تروح الراجحي و تطلب فيزا prepaid أي مسبقة الدفع و أسمها فيزا تسوق، فكرتها زي بطاقة شحن جوالك أنت تضيف الرصيد فيها عن طريق موقعهم، كيف و أشلون هذي تحصلها بجوجل.
ثانياً: تفتح صندوق بريد عند الشركة اللي تحبها، أنا أستخدم worldship و سمعت أن شركة Myus ممتازة لكن ع كلام واحد جرب الأثنين يأكد لي أن ورلد شيب أطلق لأنها تحتفظ باغراضك اللي اشتريتها لمدة 45 يوم مجاناً، يعني لو اشتريت ساعة و ارسلتها لصندوقك و ما شحنتها ثم بعد شهر شريت عقد الماسي حق خويتك اللي خرفنتك يمديك تسوي للشحن حقتك تجميع و ترسلها كشحنة وحدة.
ملاحظة: التسجيل بفلوس.
ثالثاً: بعد فتح الحساب راح يعطونك بيانات و عنوان شركة الشحن بأسمك، هذي البيانات تحطها في موقع الشراء مثل Amazon.
ملاحظات الورلدشيب
ملاحظة: الشحن يكلف على أول نص كيلو 70 ريال ع ارامكس. الاقتصادي و كل نص كيلو يضاف ينحسب ب 35 ريال.
ملاحظة2: النص كيلو = باوند واحد.
ملاحظة3: الشركة حقت الشحن تفرض رسوم على الشحن + رسوم خدمة التجميع + رسوم التأمين على الشحنة.
رابعاً: تسجل بالموقع اللي تبي تشتري منه و تصيف بياناتك + بيانات الفيزا او البطاقة الائتمانية، كيف و اشلون هدي تحصلها بالشيخ جوجل.
ملاحظة: أشتر من الناس الموثوقين زي الشركات مثل: سوني، نايك، أديداس و غيرها شركات باسماء كبيرة.
ملاحظة: إقرأ الدسكربشن قبل لا تشتري شي بعدين تتندم.
ملاحظة: أنتبه للشي قبل ما تشتريه يمكن سعره حلو لكن يكون عليه ضرايب أو سعر شحن داخلي من البائع إلى صندوق بريدك بأمريكا، ترا ما يوصلون لك الشي بلاش، لا تفكر أن الشحن يقتصر على صندوق البريد، ترا في شحن داخلي برضو.
نصيحة: خل حساب بطاقتك الإئتمانية مربوط بال PayPal لأنها وسيلة دفع آمنة، ليش؟ روح لعمك الشيخ جوجل آل جوجل.
